سياسة الخصوصية

وش نجمع

كود الجهاز. أول ما تفتحون بسطة، جهازكم يصنع كود عشوائي ويحفظه في تخزين المتصفح (أو داخل التطبيق). نحفظ عندنا نسخة مشفّرة منه بس (hash)، عشان نرجّعكم لنفس الجلسة لو فصل النت. هذا الكود ما يرتبط باسمكم الحقيقي ولا إيميلكم ولا رقمكم.

الاسم والشخصية. الاسم اللي تكتبونه والشخصية اللي تختارونها للجلسة. يشوفها اللي معكم في نفس الجلسة.

وش تلعبون. إجاباتكم وتصويتكم ورسماتكم ونقاطكم داخل اللعبة تنحفظ مع سجل اللعبة، عشان نعرض النتائج ولوحة الليلة، وما نكرر نفس الأسئلة على نفس الشلة.

الاستخدام ومعلومات الجهاز. نستخدم PostHog (خدمة تحليلات) عشان نفهم كيف تنستخدم بسطة: الصفحات، الضغطات، الوقت، نوع الجهاز والمتصفح، والموقع التقريبي (الدولة أو المدينة) من عنوان IP. وممكن تسجّل PostHog إعادة لجلسة الاستخدام عشان نصلّح المشاكل، والنص اللي تكتبونه في الخانات يكون مخفي وما يتسجل. وأحداث اللعب (مثل بدأت جلسة أو خلصت لعبة) تنحفظ بأكواد الجلسة والجهاز، مو بالأسماء.

سجلات الخادم. خوادمنا تسجّل أحداث تقنية بأكواد الجلسة واللعبة والجهاز، بدون أسماء وبدون اللي تكتبونه.

رسائلكم لنا. لو راسلتونا بالإيميل أو أرسلتوا ملاحظة من داخل بسطة، نحتفظ فيها عشان نرد عليكم.

وش ما نجمع

ما نجمع الإيميل ولا رقم الجوال ولا جهات الاتصال ولا الصور ولا موقعكم الدقيق. والضيوف ما يسوون حساب أبداً.

ليش نستخدمها

عشان نشغّل الجلسات والألعاب، ونرجّعكم لو فصل النت، ونعرض النتائج، ونجدد الأسئلة، ونصلّح المشاكل ونحسّن بسطة، ونمنع الإساءة (حدود الاستخدام وفلتر الأسماء).

ما نعرض إعلانات، وما نبيع بياناتكم، وما نشاركها لأغراض إعلانية، وما نتتبعكم في تطبيقات أو مواقع شركات ثانية.

مين يعالج البيانات معنا

Cloudflare. استضافة الموقع وخوادم اللعب.

PlanetScale. قاعدة البيانات اللي فيها سجلات الجلسات والألعاب.

PostHog. التحليلات وإعادة الجلسات (خوادمها في أمريكا).

Google Fonts. بعض الخطوط في تطبيق الويب تنحمّل من Google، فيوصلهم عنوان IP.

كم نحتفظ فيها

سجلات الجلسات والألعاب نحتفظ فيها طول ما بسطة شغالة، عشان النتائج تشتغل وما تتكرر الأسئلة على الشلة. وبيانات التحليلات تنحفظ لفترة محدودة حسب إعدادات PostHog.

خياراتكم

تقدرون تمسحون كود الجهاز بمسح بيانات الموقع من المتصفح أو بحذف التطبيق. ولو تبون نحذف البيانات المرتبطة بجهازكم أو بجلسة معيّنة، راسلونا على raghad@bastah.games مع كود الجلسة أو تاريخها.

الأطفال

بسطة مسوّاة للكبار والعوائل يلعبون مع بعض، ومو موجهة للأطفال تحت 13 سنة. ما نجمع عن قصد بيانات شخصية منهم، ولو تتوقعون إن طفل أرسل لنا شي، راسلونا ونحذفه.

لو أضفنا حسابات أو مدفوعات

لو أضفنا حسابات للمضيف (مثل الدخول بـ Apple) أو مدفوعات، بنحدّث هذي السياسة قبل ما تنزل الميزة، ونوضّح وش تغيّر.

التعديلات

لو تغيّرت السياسة، بنحدّث التاريخ فوق. والتغييرات الكبيرة بنعلن عنها داخل بسطة.